حسین سے محبتیں منزلوں کا راستہ

حسین سے محبتیں منزلوں کا راستہ
پرخطر سفر میں اک الفتوں کا قافلہ

غریب و سادہ اک حرم کی داستاں حسین ہیں
منظر امم پے رنگ جاوداں حسین ہیں
امت نبی کا اک قرار جاں حسین ہیں
گلستان دین میں بہار کا تھے سلسلہ

مثل مصطفٰی حسین و پیکر جمال تھے
صاحب زادہ علی وہ فاطمہ کے لال تھے
ابوبکر عمر غنی کی چاہ لازوال تھے
اہل بیت کو چراغ جب بجھا تو دل ہلا

صبر کا نشان تھے وہ خوبرو جوان تھے
دم بخود انہی پہ سب زمین و آسمان تھے
چاہے جس قدر میرے حسین بے امان تھے
ٹوٹ نہ سکا کبھی مگر یہ ان کا حوصلہ

کوفیوں کی بیوفائیوں کے زخم چار سو
راہ پر خطر کہ گھات میں تھے ان کے سب عدو
ماند نہ ہوا خزاؤں میں بھی رنگ آرزو
تب ترے نصیب میں شہادتوں کا در کھلا

غنچہ گلدان سرورِ جہاں حسین ہیں
منظر امم پے رنگ جاوداں حسین ہیں
نور عین رحمت دو جہاں حسین ہیں
ان کو سید شباب جنتاں لقب ملا

حسین سے محبتیں منزلوں کا راستہ
پرخطر سفر میں اک الفتوں کا قافلہ

شاعری : سلیم اللہ صفدر

اگر آپ مزید حمدیہ اشعار، نعت شریف یا شان صحابہ پر کلام پڑھنا چاہتے ہیں تو یہ لازمی دیکھیں